حيل تحافظي بيهم على الشوز من الروايح الكريهة

الشوز من اكتر الحاجات المعرضة للنمو البكتيري والفطري لانه مقفول وبيحتفظ بالرطوبة جواه فترة طويلة وبالتالي ده بيأدي في النهاية للريحة الكريهة للشوز اللي مش بنعرف نتخلص منها بسهولة وممكن تسبب لنا احراج مع اللي حوالينا, عشان كده النهاردة من خلال موضوعنا هنقولك طرق التخلص من الروايح الكريهة في الشوز.

طرق التخلص من الروايح الكريهة في الشوز:

1- حيلة الشراب:

اعملي خليط من كميات متساوية من صودا الخبز “الكربوناتو”, والبكينج بودر, والنشا, حطي الخليط ده في اي شراب قطن عندك, وحطيه جوه الشوز وسيبيه من بالليل للصبح, الخليط ده هيمتص اي روايح كريهة زي السحر, وممكن كمان تضيفي للخليط كام نقطة من اي نوع زيت عطري تفضليه ده هيخلي ريحة الشوز حلوة.

2- حيلة فلتر القهوة:

ممكن تجيبي فلتر القهوة ولو مش متوفر عندك ممكن تستخدمي اي قطعة شاش او قماش خفيف وتحطي فيه كمية من صودا الخبز, مع كام نقطة من اي نوع زيت عطري, وحطيها جوه الشوز وسيبيها من بالليل للصبح عشان تمتص اي روايح.

3- حيلة قشر الفاكهة:ممكن تستخدمي للحيلة دي قشر ليمون, او برتقان, او يوسفي اي نوع فاكهة حمضية, وممكن تعملي خليط قشر من اكتر من نوع مع بعض, خدي القشر نشفيه الاول في الهوا او في الفرن, وبعدين حطي كمية من القشر جوه الشوز وسيبيه من بالليل للصبح وبعدين شيليهم من الشوز.

4- حيلة الزيوت الاساسية:

ممكن تستخدمي زيت اللافندر او زيت الليمون, حطي كام نقطة جوه الشوز من بالليل, هتصحي الصبح تلاقي الشوز ريحته حلوة ومافيش فيه اي روايح كريهة.

5- حيلة مستخلص الفانيليا:

مستخلص الفانيليا اللي بنستخدمه مع الحلويات, حطي منه كام نقطة على ورق جرايد, كرمشي ورق الجرايد وحطيه جوه الشوز وسيبيه كام ساعة هيمتص اي روايح كريهة من الشوز.

– طريقة سبراي للتخلص من الروايح الكريهة:

المكونات:

– 10 نقط من زيت الليمون.

– 10 نقط من زيت شجرة الشاي.

– 10 نقط من زيت القرنفل.

– 10 نقط من زيت الروز ماري.

– 10 نقط من زيت القرفة.

– ازازة زجاج صغيرة.

الطريقة:

هنحط كل الزيوت في الازازة ونملى باقي الازازة بالمية ونرج الخليط كويس, وكده يبقى السبراي بتاعنا جاهز, تقدري ترشي منه جوه الشوز عشان تتخلصي من اي روايح كريهة.

وضروري تحتفظي بالخليط في ازازة زجاج مش بلاستيك عشان زيت الليمون ممكن يتفاعل مع البلاستيك ويبوظ.

المصدر: بنات حوا