اعرفي ايه الاكل المناسب ليكي حسب شكل جسمك !

معظمنا لما بنحاول نعرف شكل جسمنا بيبقى عشان نعرف ايه اللبس اللي يليق علينا ويناسبنا لكن الجديد اللي منعرفوش ان شكل الجسم ممكن يحدد النظام الغذائي اللي تمشي عليه وايه الاكل المناسب حسب شكل جسمك, وكمان بيحددلك الخصائص الهرمونية الخاصة بيكي اللي تقدري تحددي عن طريقها افضل التمارين الرياضية اللي ممكن تساعدك على فقدان الوزن.

وانواع الاجسام ممكن نقسمها لتلات انواع وهي الجسم على شكل تفاحة, والجسم الكمثري, والجسم على شكل ساعة رملية.

– الجسم على شكل تفاحة: اللي بيكون الدهون فيه متركزة في منطقة البطن والرجل بتبقى انحف.
– الجسم الكمثري: بيكون الجسم من فوق انحف من الجزء اللي تحت وبتكون الدهون متخزنة في منطقة الارداف والفخدين.

– الجسم على شكل ساعة رملية: ده تقريبا بتبقى كل اجزاء الجسم متناسقة والدهون متوزعة زي بعض على الجسم كله وده يعتبر افضل جسم لانه بتبقى عملية التمثيل الغذائي فيه ماشية بشكل مظبوط جدا.
ولان كل جسم مختلف عن التاني والدهون بتتخزن باشكال مختلفة من هنا هنقدر نحدد نوع التغذية المناسبة لشكل كل جسم, وهتلاحظي فرق ملحوظ فعلا في الجسم لما تاكلي الاكل الصح المناسب ليكي وهتحسي باختلاف وتحسن كبير في مستوى الطاقة في الجسم, وتحسين عملية التمثيل الغذائي, وفقدان الوزن الزايد بسرعة وبسهولة.

– تعالوا نعرف مع بعض ايه الاكل المناسب حسب شكل جسمك:

1- الجسم على شكل تفاحة:

الجسم ده بيعاني دايما من وجود زيادة من الانسولين وهرمون الكورتيزول مع تخزين الدهون حوالين منطقة البطن, وبيحتوي على مستويات عالية من الاندروجين ودي بيأدي لتخزين الدهون في منطقة حول الصدر والخصر والضهر والبطن وده ممكن يأدي لخطر الاصابة بامراض كتير زي امراض القلب والسكر والسرطان.ومن ناحية تانية صاحبات الجسم على شكل تفاحة بيعانوا من نحافة في منطقة الساقين والذراعين, والنوع ده من الجسم وزنهم بيزيد بسرعة لكن عندهم ميزة وهما انهم ممكن يفقدوا الوزن بسرعة.

– التغذية المناسبة للجسم على شكل تفاحة:
لازم تاخدي بالك من كمية السعرات الحرارية اللي بتدخل جسمك كل يوم وتتوزع بشكل متوازن على المغذيات المختلفة زي الكربوهيدرات لازم تحصلي منها على 30% يوميا, والبروتين 35%, والدهون 35%.

وتركزي انك تاخدي كميات عالية من البروتين والخضار مع كمية كافية من الدهون الصحية, وتلبية احتياج الجسم من الكربوهيدرات من الاكلات زي الخضار والفاكهة.

واتجنبي الاكلات اللي بتحتوي على نسبة عالية من الكربوهيدرات لانها بتتحول في الجسم لسكريات وبالتالي بتتخزن في الجسم على شكل دهون, يعني اختاري الاكلات الغنية بالكربوهيدرات مرة واحدة بس في الاسبوع مش بشكل يومي.

– الاكلات المناسبة :
1- الدهون الاحادية الغير مشبعة الصحية: الدهون الصحية مفيدة للقلب جدا ودي هنلاقيها في المكسرات زي الجوز واللوز, والبذور زي الحلبة والشوفان والشيا, زيت الزيتون, زيت جوز الهند, زبدة الفستق, الجبن كامل الدسم, والاكلات اللي بتحتوي على الدهون الصحية دي بتساعد في الحفاظ على نسبة السكر في الدم وبتمنع افراز الانسولين بشكل زيادة, وبتسيطر على هرمون الشهية اللي ممكن يخلينا ناكل كتير, وبتساعد على عمل توازن بين مستويات السكر والانسولين في الجسم.

2- الدهون المضادة للالتهابات: ودي هنلاقيها في الافوكادو, زيت الزيتون, سمك السلمون, الحبوب الكاملة زي الشعير والحبة السوداء, الاكلات دي بتساعد على استقرار مستويات السكر في الدم, وبتسيطر على مستويات الكورتيزول.

3- الفاصوليا البيضا: الفاصوليا تعتبر مصدر طبيعي لعنصر فسفاتيديل ودي مادة كيميائية بتساعد على خفض مستوى هرمون الكورتيزول اللي هو هرمون التوتر في المخ, كمان الفاصوليا غنية جدا بالالياف اللي بتساعد على توازن واستقرار مستويات الانسولين في الجسم.

4- التوت: التوت بيحتوي على مركبات حيوية نشطة بتساعد على زيادة حساسية الانسولين وبتقلل الاصابة بمرض السكر.

5- الشوكولاتة الغامقة او الكاكاو: الشوكولاتة الغامقة بتحتوي على انزيمات بتحافظ على مستويات ضغط الدم في الجسم, كمان يتزود من مادة السيروتونين ودي مادة كيميائية ليها تأثير مضاد للاكتئاب, وبتقلل من مستوى هرمون الكورتيزول في الدم وبالتالي بتخفف من الاجهاد والاكتئاب.

6- البروتينات: البروتينات اللي موجودة في الفراخ, واللحمة, واللحم البقري, بتساعد على على خفض مستوى هرمون الليبتين في الجسم وده بيأدي لتحسين عملية التمثيل الغذائي وحرق الدهون وفقدان الوزن بشكل اسرع.

7- الخضروات الورقية: زي السبانخ, اللفت, الكرنب وغيرها من الخضروات الورقية الخضرا بتساعد على حرق الدهون في الجسم بدل تخزينها.

– اكلات تجنبي اكلها:
1- المُحليات الصناعية: الاكلات اللي بتحتوي على الاسبارتام او المحليات الصناعية بتثير الانسولين في الدم واللي بتساهم في زيادة الشهية وبالتالي زيادة في الوزن.

2- القهوة والمشروبات اللي فيها كافيين: بتساهم في زيادة مستويات هرمون الكورتيزول والانسولين في الدم.

3- الكربوهيدرات المكررة: زي اللي موجودة في الارز والمكرونة والخبز الابيض هي اكلات منخفضة الدهون لكن بتأدي لزيادة نسبة السكر في الدم واللي ممكن يأدي لزيادة الضغط على الجسم وتخليكي تحسي بالجوع اكتر.

4- الاكلات المحلاة بالسكر: الاكلات دي بتأدي لزيادة الرغبة في الاكل وفتح الشهية وبتخليكي تاكلي كميات اكل كبيرة.

5- الاكلات الغنية بالسكر: زي البسكوتات والكوكيز وغيرها من الاكلات اللي بيكون فيها نسبة سكر عالية بتساعد على زيادة مستويات الانسولين في الدم وبالتالي بتأدي لزيادة الوزن, وكمان الفاكهة الغنية بالسكر زي المانجا والعنب والاناناس والزبادي اللي بالفاكهة ومشروبات الطاقة والعصاير المعلبة.

6- الوجبات السريعة: زي الشيبسي والبيتزا والبرجر وغيرها من الاكلات اللي فيها نسبة دهون وكربوهيدرات عالية, حتى الكربوهيدرات الصحية كمان زي اللي موجودة في البطاطس والارز البني والحمص الجسم اللي على شكل تفاحة حساس جدا ليها ولازم يتجنبها لانها بتأدي لزيادة الوزن.

2- الجسم الكمثري:

الجسم اللي على شكل كمثرى بيكون عنده زيادة في هرمون الاستروجين وبتتخزن الدهون عندهم في منطقة الوركين والفخدين, وهرمون الاستروجين ده ممكن يأدي لامراض زي ارتفاع الدهون السامة في الجسم, واحتباس المية, والانتفاخ وغيرها من المشاكل الصحية.

والجسم ده عادة بيكون الجزء اللي فوق انحف من اللي تحت مع وزن زيادة بنسبة بسيطة حوالين الصدر والذراعين.

والجسم الكمثري بتقابله مشكلة شوية في انقاص الوزن لانه مش بيكون سهل انك تتخلصي من الدهون الزيادة المتراكمة في منطقة الوركين والفخدين, يعني سهل تخسسي اماكن تانية في الجسم لكن الجزئين دول بيكونوا اصعب.

عشان كده لازم صاحبات الجسم الكمثري ياكلوا الاكلات اللي تساعد على تقليل هرمون الاستروجين من الجسم عشان يقدروا يقللوا زنهم.

ومن الناحية الصحية الجسم الكمثري يعتبر محظوظ اكتر من الجسم على شكل تفاحة لانهم مش معرضين لخطر الاصابة بامراض زي امراض القلب والسكر, لان نوع الدهون اللي عندهم بيقلل من مقاومة الانسولين, وبيزود من الكوليسترول الجيد في الجسم.

– التغذية المناسبة للجسم الكمثري:
صاحبات الجسم الكمثري لازم يستهلكوا السعرات الحرارية والكربوهيدرات بشكل كافي عشان يضمنوا ان عملية التمثيل الغذائي تمشي بشكل مظبوط.

والمواد الغذائية اللي المفروض تحصلي عليها بشكل يومي هتبقى 50% كربوهيدرات, 25% دهون, 25% بروتين.

واتبعي نظام غذائي منخفض الدهون عشان يساعد على كسر الدهون الصعبة المتراكمة في الجزء السفلي من الجسم.

الاكلات المناسبة:

1- بذور الكتان: من الحاجات اللي بتساعد على القضاء الاستروجين الزيادة في الجسم.

2- الخضروات: زي الكرنب, القرنبيط, والخضروات الورقية اللي من نفس النوع بتحتوي على كميات عالية من المغذيات النباتية اللي بتساعد على خفض هرمون الاستروجين.

3- الالبان العضوية ومنتجات اللحوم: بتساعد على تقليل هرمون الاستروجين.

4- اللبن قليل الدسم: منتجات الالبان قليلة الدسم بتساعد على تنظيم طريقة تخزين الدهون في الجسم وبتقسمها بشكل متساوي على اجزاء الجسم.

5- الفواكة الغنية بالالياف والخضروات: زي الخرشوف والبنجر وغيرها من الخضروات اللي بتحتوي على نسبة عالية من الالياف بتساعد على القضاء على هرمون الاستروجين الزيادة في الجسم.

6- البروكلي: البروكلي غني بعنصر بيساعد على خفض مستوى هرمون الاستروجين ف الجسم, كمان غني بالمغذيات النباتية اللي بتساعد على تقليل خطر الاصابة بمرض السرطان.

7- الفاصوليا: غنية بحمض الجلوكاريك اللي بيسيطر على امتصاص الجهاز الهضمي لهرمون الاستروجين وبالتالي الجسم بيتخلص من هرمون الاستروجين الزيادة.

8- الحبوب الكاملة: زي الشوفان والحبة السوداء هي مصدر ممتاز للاستروجين النباتي والمضاد لاستروجين البلوليفينول اللي بيساعد على خفض هرمون الاستروجين.

9- البروتين الخالي من الدهون: البروتينات الخالية من الدهون بيحتوي على يسين وثريونين والمركبات دي بتساعد على تحسين وظايف الكبد وبتخليه يشتغل بشكل سليم, وبتحسن عملية التمثيل الغذائي.

– اكلات تجنبي اكلها:
1- منتجات الالبان عالية الدهون ومنتجات الصويا: الاكلات دي بتزود من نسبة هرمون الاستروجين في الجسم.

2- الكافيين: القهوة والشاي وكل المشروبات اللي بتحتوي على الكافيين بتأدي لزيادة نسبة هرمون الاستروجين.

3- الكربوهيدرات البيضا/المكرونة: الكربوهيدرات دي بتزود السكر في الدم بشكل كبير واللي بتأدي لاحتباس المية وتراكم الدهون في الجزء السفلي من الجسم.

4- اللحوم المصنعة: اللحوم دي بتحتوي على نسبة عالية من الدهون وبالتالي ده بيأدي لزيادة في نسبة هرمون الاستروجين وبالاضافة لكده كمان اللحوم دي بيبقى فيها نسبة عالية من الملح وبالتالي بتأدي لاحتباس المية في الجسم.

5- الدهون الضارة: ودي بتشمل تقريبا كل انواع الزيوت المهدرجة والزيوت المهدرجة جزئيا اللي بتكون موجودة غالبا في كل انواع السمنة والسمنة النباتي, والدهون دي بتزود من انتاج هرمون الاستروجين.

6- الزيوت: وتشمل تقريبا كل انواع الزيوت النباتية زي زيت عباد الشمس وزيت النخيل وغيرها من الزيوت اللي بتزود مستوى هرمون الاستروجين في الجسم.

7- الدهون المشبعة: ودي بتيجي من مصادر حيوانية زي منتجات الالبان عالية الدسم, واللحوم الحمرا.

3- الجسم على شكل ساعة رملية:

الجسم ده شكله بيكون ما بين الجسم اللي على شكل تفاحة والجسم الكمثري, وصاحبات الجسم ده بيكون عندهم هرمونات الغدة الدرقية منخفضة والوزن متوزع بالتساوي على كل اجزاء الجسم.

الجسم ده شكله بيبقى رياضي وفيه كتلة عضلية في الذراعين والصدر والركبتين والكاحلين, وبيكون فيه نسبة دهون قليلة.

والجسم على شكل ساعة رملية يعتبروا محظوظين لان عندهم ارتفاع في عملية التمثيل الغذائي وبالتالي بيحرقوا الدهون بسهولة جدا وممكن يكسبوا وزن ويخسوا من غير ما يبذلوا مجهود.

– التغذية المناسبة للجسم على شكل ساعة رملية:
وعشان الجسم ده بيكون ما بين الجسم الكمثري والجسم التفاحي بيحتاج تقسيم المواد الغذائية الرئيسية بنسب متساوية ما بين البروتين والكربوهيدرات والدهون, يعني محتاج ياخد من واحد فيهم تلت كمية السعرات الحرارية اللي محتاجها.

– الاكلات المناسبة:
1- الخضروات والفاكهة الطازة: زي البرتقان والتفاح والكمثرى والفجل والجزر والخضروات الورقية الخضرا.

2- الحبوب الكاملة: زي الشوفان والحبة السودا وغيرها من الحبوب الكاملة.

3- اللحم البقري: تعتبر مصدر طبيعي لليود والحديد والاحماض الدهنية القوية وحمض اللينوليك.

4- الزبادي: غني بالبروتينات, وفي نسبة منخفضة من الكربوهيدرات والدهون.

5- زيت جوز الهند: بيساعد على تقليل الدهون في منطقة البطن وبيساعد على زيادة الطاقة.

6- المكسرات البرازيلية: غنية بالسيلينيوم والعنصر ده بيساعد الغدة الدرقية تشتغل بشكل سليم.

– اكلات تجنبي اكلها:
1- المشروبات اللي بتحتوي على الكافيين: زي الشاي والقهوة وغيرها من المشروبات, وكمان مشروبات الطاقة والمشروبات الغازية.

2- الكربوهيدرات المكررة: زي الدقيق الابيض وكل المنتجات اللي بتحتوي على الدقيق الايض في مكوناتها زي الخبز الابيض والمكرونة.

3- فول الصويا غير المخمر: فول الصويا وكل المنتجات المصنعة منه زي حليب الصويا وجبنة التوفو والصويا صوص لانها بتزود مستوى هرمون الاستروجين, وكمان بتمنع الغدة الدرقية انها تشتغل بشكل صحيح.

4- الفلورايد والمية المعالجة بالكلور: لانها بتقيد وظيفة الغدة الدرقية.

5- الخضروات: زي الكرنب والقرنبيط والبطاطا الحلوة والفاصوليا والذرة ممكن تتعارض مع تركيب هرمون الغدة الدرقية وبالتالي ده ممكن يأدي لتضخم الغدد.

6- الفول السوداني وزبدة الفول السوداني: البقوليات دي ممكن تمنع وظيفة الغدة الدرقية.

7- الاسماك اللي بتحتوي على نسبة عالية من الزئبق: زي سمك الماكريل وسمك القرش وابو سيف والتونة ممكن تأدي لاختلال في الغدة الدرقية.

المصدر: بنات حوا